Наурыздың 11-і күні 8-ші наурыз – халықаралық әйелдер мерекесі күніне орайластырылып университетіміздің «Қыз Жібек» қыздар ұйымы, “Jas Otan” жастар қанаты ұйымы және «Қазақстан студенттер Альянсы» ұйымдарының ұйымдастыруымен дәстүрлі “Miss SMU – 2022” байқауы өткізілді. Сайысқа алғашқы іріктеу кезеңінен белсенді де дарынды деп танылған алты аруымыз іріктеліп алынып, қатыстырылды. Алты кезеңнен тұратын сайыста аруларымыз өз бақтарын сынап, әр қырларынынан ашылып, өнерлерін алға тартуға үлкен мүмкіндік жасалды.
Байқау шарттары мен кезеңдеріне сай аруларымыз өз өнерлерін ортаға салып, ұлттық дәстүріміз бен тарихымызды насихаттау мақсатындағы білімдерін шыңдап, тал бойына жарасқан сымбатына сай ұлттық нақыштағы және қазіргі заманға сай киім үлгілерін таныстырып, тәрбиелік мәні бар бір күндік өмірлерін түсірген видеоқойылымдары тамашаланды. Атаулы сайысқа қыздарымыздың аса ұқыптылықпен үлкен жауапкершілік таныта отырып белсенді түрде дайындалғандықтары байқалды.
Атаулы шараны ұйымдастырып, өткізудегі негізгі мақсат қыз балаларымыздың түрлі қырынан ашылып, олардың өнерлері мен білімдерінің шыңдалуына мүмкіндік тудыру және ұлттық дәстүрімізді насихаттау мен қыз балалардың ұлттық тәрбиесі мәселесін кеңінен тарату.
Әділ қазыларымыздың әділ шешімі нәтижесі бойынша “Miss SMU-2022” байқауының жеңімпазы тәжіне «Жалпы медицина» мамандығының 4 курс студенті Еркежан Ержанқызы ие болды. Тәжді “Miss SMU-2019” және қалалық “Miss SEMEY-2019” байқауларының жеңімпазы Мажитова Ботагөз табыстады. Сонымен қатар, І-орын иегері – Арайлым Елетова, ІІ-орын иегері – Бақжан Махмутжан, ІІІ-орын иегері – Еркежан Ергалиева, «Өнерлі ару» номинациясын Анжела Владимирова және «Білімді ару» номинациясын Ұлпан Рымбаева иеленді.
Байқау жеңімпаздарына қолдаушыларымыздың дайындаған арнайы бағалы сыйлықтары табысталып, лайықты сый құрмет көрсетілді. Атаулы байқауымызды жоғарғы деңгейде ұйымдастырып өткізуде үлес қосқан қолдаушыларымыз «SENIM» Денсаулық сақтау жүйесі жұмыскерлерінің салалық кәсіптік одағы» РҚБ Шығыс –Қазақстан облысы филиалы төрағасы Зейнуллин Нұржан Асанұлына және «Семей медицина университеті» КеАҚ кәсіподақ ұйымының төрағасы Советов Бақытбек Советұлына үлкен алғыс білдіреміз.
«Қыз Жібек» қыздар ұйымы,
Ұйым жетекшісі Л.К. Садыкова
