Цифрлық дағдылар – маманның қазіргі еңбек нарығына сәтті бейімделуінің басты факторларының біріне айналып отыр, бұл барлық салаға қатысты. Ұйымдар цифрлық технологияларды енгізіп, онлайн-өзара әрекеттесуге көшіп, бұлтты платформаларды қолданып, процестерді автоматтандыруда. Мұндай жағдайда маманның цифрлық құзыреттілігі оның кәсіби құзыреттілігінің негізгі құрамдас бөлігіне айналады.
Цифрлық дағдылар маманға күнделікті қызметінде заманауи құралдарды пайдалануға мүмкіндік береді: мәтіндік редакторлар мен электрондық кестелерден бастап, қауіпсіздік жүйелері мен бұлтты сақтау қызметтеріне дейін. Мысалы, Excel, 1С және бұлтты бухгалтерлік сервистерді меңгерген экономист қаржылық ағындарды жылдамырақ талдап, есептер дайындап, бақылаушы органдармен тиімді әрекеттесе алады.
Цифрлық сауаттылық қашықтан жұмыс істеу, фриланс және икемді жұмыс кестесі сияқты мүмкіндіктерге жол ашады. Бұл – әсіресе экономикалық тұрақсыздық немесе дағдарыс жағдайында, онлайн жұмыс істеу қабілеті бәсекелік артықшылыққа айналғанда өте өзекті.
Цифрлық құралдар күнделікті рутиналық тапсырмаларды автоматтандыруға, операцияларды орындауға кететін уақытты қысқартуға және шығармашылық немесе аналитикалық жұмыстарға назар аударуға мүмкіндік береді. Қазіргі мамандар цифрлық ортада тиімді әрекеттесе білуі керек: онлайн-кездесулерге қатысу, хат алмасу, файлдармен бөлісу, құжаттарды бірлесіп өңдеу. Цифрлық дағдылар маманның біліктілігін үнемі арттыруына жол ашады – бұл үшін онлайн-курстар, вебинарлар және оқу платформалары бар. Бұл – білімнің тез ескіретін заманында аса маңызды.
Жұмыс берушілер цифрлық ортада сенімді әрекет ете алатын, технологиялық өзгерістерге тез бейімделетін және инновациялық шешімдер ұсына алатын кандидаттарға басымдық береді. Мысалы, HRM жүйелері мен персонал деректерін талдау құралдарын меңгерген HR-маман кадрларды дәлірек іріктеп, кадр айналымын болжай алады және басқарудың тиімді стратегияларын жасай алады.
Медицинадағы цифрландыру кезеңінде медициналық жоғары оқу орындары, соның ішінде «Семей медицина университеті» КЕАҚ, болашақ дәрігерлердің цифрлық құзыреттілігін жоғары деңгейде қалыптастыруға ерекше көңіл бөлуде. Себебі цифрлық дағдылар медицина қызметкерлеріне клиникалық тұрғыдан құзыретті болып қана қоймай, күнделікті кәсіби қызметінде цифрлық құралдарды тиімді пайдалануға мүмкіндік береді.
Қазіргі клиникалар мен ауруханалар науқастар туралы деректерді сақтау, талдау және алмасу үшін электрондық медициналық карталарды (ЭМК) кеңінен қолдануда. Мұндай жүйелермен жұмыс істей алатын болашақ мамандар жұмыс берушілердің талаптарына тезірек бейімделіп, әкімшілік жүктемені азайта алады.
Медициналық құрылғылармен және цифрлық диагностиканы қолданумен жұмыс істеу дағдылары да өте маңызды. Қазіргі заманғы диагностикалық құрылғылар (мысалы, УДЗ-аппараттары, КТ, МРТ) бағдарламалық қамтамасыз етуді меңгеруді, нәтижелерді талдауды, кейде тіпті шешім қабылдауға қолдау көрсету үшін жасанды интеллект элементтерін пайдалануды талап етеді.
Болашақ дәрігерлер цифрлық білім беру ресурстары мен платформалары (Coursera, Medscape, UpToDate) арқылы өз білімдерін үнемі жаңартып отыруға дайын болуы керек. Мысалы, UpToDate платформасын клиникалық шешімдер қабылдауда қолданатын интерн өз әрекеттеріне сенімдірек болып, стационар жағдайына тезірек бейімделе алады.
Университетте білім беру бағдарламаларын әзірлеу барысында болашақ медициналық мамандардың цифрлық дағдыларын дамытуға бағытталған пәндер енгізілген. Оқыту нәтижелері мынадай қабілеттерді қалыптастыруға бағытталған:
цифрлық инфрақұрылымы бар заманауи мекемелерде жұмыс істеу;
икемді және бейімделгіш болу;
онлайн және офлайн форматтарда сапалы қызмет көрсету;
деректер қауіпсіздігінің жоғары стандарттарын қамтамасыз ету;
инновациялық медицинаны дамытуға қатысу.
Осылайша, цифрлық сауаттылық пен цифрлық құралдарды сенімді меңгеру – цифрлық экономика мен болашақ денсаулық сақтау жүйесінің талаптарына дайын бәсекеге қабілетті маманды қалыптастырады.