Шетелде білім алуды немесе кәсіби дамуды жоспарлап жүрген білім алушылар, оқытушылар және барша тұрғындар үшін жақсы жаңалық!
Семей медицина университетінде TOEFL iBT халықаралық емтиханын тапсыратын ресми авторизацияланған орталық ашылды.
Енді ағылшын тілін меңгеру деңгейін бағалайтын әлемдегі сұранысқа ие емтихандардың бірін тапсыру үшін басқа қалаға барудың қажеті жоқ. Емтиханды университетіміздің жайлы жағдай жасалған, ресми сертификатталған орталығында тапсыруға болады.
TOEFL iBT нәтижелерін әлемнің 160-тан астам еліндегі 13 000-нан астам университет пен ұйым мойындайды. Бұл емтихан:
• шетелдік университеттерге оқуға түсу;
• академиялық ұтқырлық бағдарламалары мен халықаралық гранттарға қатысу;
• «Болашақ» халықаралық стипендиясына өтінім беру;
• кәсіби және мансаптық өсу үшін маңызды қадам болып табылады.
«Семей медицина университеті» КеАҚ-да TOEFL iBT авторландырылған орталығының ашылуы ТДМ 4 — «Сапалы білім беру» мақсатына сәйкес келеді, өйткені бұл бастама ағылшын тілін меңгеру деңгейін бағалаудың халықаралық деңгейде танылған жүйесіне қолжетімділікті кеңейтеді, академиялық ұтқырлықты дамытуға, білім алушыларды даярлау сапасын арттыруға және жаңа білім беру мүмкіндіктерін қалыптастыруға ықпал етеді. Сонымен қатар, аталған бастама ТДМ 17 — «Тұрақты даму мақсатындағы әріптестік» мақсатына қол жеткізуге үлес қосады. Ол «Семей медицина университеті» КеАҚ пен ETS ұйымы арасындағы халықаралық ынтымақтастықтың нәтижесі болып табылады және білім беруді дамытуға, халықаралық интеграцияны тереңдетуге және өңірдің бәсекеге қабілеттілігін арттыруға бағытталған әріптестік байланыстарды нығайтады.
Біздің орталықта емтихан тапсыру үшін ETS ұйымының ресми сайтында стандартты тіркеуден өтіп, емтихан тапсыратын орталық ретінде Семей медицина университетін таңдау қажет.
Семей медицина университетінің жанындағы ресми авторизацияланған TOEFL iBT орталығына қош келдіңіздер!