Профессор Д. Р. Мусинов атындағы клиникалық онкология, радиология және ядролық медицина кафедрасында 2026–2027 оқу жылында «Ересектер онкологиясы», «Радиациялық онкология» және «Ядролық медицина» мамандықтары бойынша резидентураның білім беру бағдарламаларына қабылданған бірінші оқу жылындағы резиденттермен кездесу өтті.

Кездесудің негізгі мақсаты — жаңа резиденттермен танысу, оқу үдерісін бастауға қолайлы жағдай қалыптастыру, сондай-ақ олардың кәсіби қызығушылықтары, білім алу тәжірибесі мен ғылыми жетістіктері туралы ақпарат алу болды.

Кездесу барысында әрбір резидент өзін таныстырып, білім алу жолы туралы айтып берді. Атап айтқанда, қай жерде білім алғаны, медициналық білім алуға қанша жылын арнағаны, қандай ғылыми және кәсіби жетістіктерге қол жеткізгені туралы ақпаратпен бөлісті. Сонымен қатар резиденттер ағылшын тілін меңгеру деңгейі, кәсіби қызығушылықтары және резидентурада оқу кезеңіндегі жоспарлары туралы айтып өтті.

Кездесу барысында болашақ мамандықты таңдауға ерекше назар аударылды. Резиденттер өздерінің кәсіби қызметін онкология, радиациялық онкология және ядролық медицина салаларымен байланыстыру туралы шешім қабылдау себептерімен бөлісіп, алдағы оқу үдерісінен күтетін нәтижелері туралы айтып берді.

Мұндай кездесулер резидентурадағы оқу үдерісінің бастапқы кезеңінде маңызды рөл атқарады. Себебі олар жаңа резиденттермен танысып қана қоймай, алдағы уақытта тиімді кәсіби қарым-қатынас орнатуға және достық әрі кәсіби орта қалыптастыруға мүмкіндік береді.

Профессор Д. Р. Мусинов атындағы клиникалық онкология, радиология және ядролық медицина кафедрасының ұжымы бірінші оқу жылындағы резиденттерді құттықтап, оларға оқуында табыс, кәсіби өсу, жаңа ғылыми жетістіктер және таңдаған мамандығы бойынша биік белестерге жетуіне тілектестік білдіреді!